MOFPORT
SERA YA FARAGHA · TOLEO LA 20 OKTOBA 2026
Faragha yako kwenye MOFPORT
Sera hii inaeleza jinsi MOFPORT, mfumo wa kusimamia vyombo vya usafiri unaotolewa na MOFULI Multibusiness & Services (BRELA 630591, Dar es Salaam, Tanzania), unavyokusanya, kutumia, kuhifadhi na kulinda taarifa binafsi. Tunazingatia Sheria ya Ulinzi wa Taarifa Binafsi ya Tanzania, 2022, na kanuni zake.
1. Nani anafanya nini
- Kampuni ya usafiri (mteja wetu) ndiyo inayoamua taarifa za madereva na vyombo vyake zikusanywe kwa ajili ya kazi yake. Kwa taarifa hizo kampuni ndiye mdhibiti, na MOFULI ni mchakataji anayefanya kazi kwa maelekezo ya kampuni.
- MOFULI ndiye mdhibiti wa taarifa za usajili wa kampuni, akaunti za ofisi, malipo ya vifurushi na usalama wa mfumo.
2. Taarifa tunazokusanya
| Kuhusu nani | Taarifa | Kwa nini |
|---|---|---|
| Kampuni na mmiliki | Jina la kampuni au la mmiliki, TIN, BRELA, leseni ya biashara, NIDA na nakala za nyaraka, simu, barua pepe, anwani, nembo, IP na mahali pa ofisi (kwa ruhusa ya kivinjari) | Kuhakiki kuwa kampuni ni halali, kufungua akaunti, mawasiliano, usalama |
| Madereva | Jina, simu, barua pepe (hiari), NIDA, leseni ya udereva na picha yake, hesabu za kila siku, deni, alama ya utendaji | Kumtambua dereva, hesabu na usimamizi wa kazi kwa niaba ya kampuni |
| Mahali (GPS) | Mahali, kasi na umbali wa chombo kati ya "Anza zamu" na "Maliza zamu" tu, pamoja na mahali pa simu inapounganishwa mara ya kwanza | Usalama wa chombo na dereva, hesabu za km, tahadhari za kasi, SOS |
| Vyombo | Namba za usajili, bima, LATRA, ukaguzi, picha za chombo, odometer, risiti za mafuta, picha za vipuri, service na matumizi | Vikumbusho vya nyaraka, faida ya chombo, kuzuia udanganyifu |
| Malipo | Kifurushi, kiasi, njia na namba ya muamala | Kutoa ufunguo wa leseni na risiti |
3. Ufuatiliaji wa madereva
- Dereva anaonyeshwa maelezo ya ufuatiliaji na kutoa ridhaa kwenye app kabla ya zamu ya kwanza. Kampuni ina wajibu wa kumweleza dereva haya na kupata ridhaa yake.
- GPS inatumwa tu wakati wa zamu, na app inaonyesha arifa ya "unafuatiliwa" muda wote wa zamu.
- Hatufuatilii simu ya dereva nje ya zamu, wala hatusomi ujumbe, picha au programu nyingine za simu yake.
4. Uchambuzi wa picha kwa AI
Kipengele hiki kikiwa kimewashwa (mmiliki wa kampuni anaweza kukizima wakati wowote kwenye kichupo cha "AI ya picha"), picha za odometer, vipuri na risiti za mafuta hupelekwa kwa mtoa huduma wa AI (Google Gemini, au Anthropic Claude) ili kusoma namba, kutambua kipuri au kusoma risiti. Picha nyingine (za chombo, nyaraka, matatizo) hazipelekwi. Matokeo yanasaidia ofisi kuhakiki, na uamuzi wa mwisho unafanywa na mtu. Tunapotumia kiwango cha bure cha Google Gemini, masharti ya Google yanairuhusu kutumia maudhui yanayotumwa kuboresha huduma zake; picha hizi ni za vyombo, odometer, risiti na vipuri tu, na hatutumi majina wala namba za simu za madereva pamoja nazo.
5. Tunawapa nani taarifa
- Hatuuzi taarifa zako. Kampuni moja haiwezi kuona taarifa za kampuni nyingine.
- Watoa huduma tunaowatumia kuendesha mfumo: mwenyeji wa seva (hosting), DarSMS (kutuma SMS), mtoa huduma wa barua pepe, ramani (OpenStreetMap, CARTO, Esri: hupokea maeneo ya ramani yanayoonyeshwa, si taarifa za madereva), na Google au Anthropic (uchambuzi wa picha, kama umewashwa).
- Mamlaka za serikali pale tu tunapolazimishwa na sheria au amri halali.
- Baadhi ya watoa huduma hawa wako nje ya Tanzania. Tunahamisha taarifa nje ya nchi tu kwa kiasi kinachohitajika kutoa huduma, na kwa ulinzi unaotakiwa na sheria.
6. Muda wa kuhifadhi
- Pointi za GPS: miezi 6, kisha zinafutwa moja kwa moja. Muhtasari wa km kwa kila safari unabaki kwenye historia ya kampuni.
- Hesabu, matumizi, service na risiti: muda wote akaunti ikiwa hai, kwa sababu ni kumbukumbu za kibiashara za kampuni.
- Dereva akiondolewa, akaunti yake inazimwa mara moja; historia ya kazi yake inabaki kwa kampuni.
- Kampuni ikiomba kufunga akaunti, taarifa zake zinafutwa au kurudishwa kwake ndani ya siku 90, isipokuwa zile tunazolazimika kuzihifadhi kisheria (kama kumbukumbu za malipo).
7. Usalama
- Mawasiliano yote kwa HTTPS; nywila zinahifadhiwa kwa hash; nyaraka ziko nje ya sehemu ya umma ya seva.
- Kila kampuni imetengwa: majaribio yanathibitisha kuwa kampuni moja haiwezi kusoma au kubadilisha taarifa za nyingine.
- Nakala za akiba (backup) za database zinahifadhiwa kila siku.
8. Haki zako
Una haki ya kujua taarifa zako tulizonazo, kuzipata, kuzirekebisha, kupinga matumizi fulani, kuomba zifutwe pale sheria inaporuhusu, na kulalamika kwa Tume ya Ulinzi wa Taarifa Binafsi (PDPC). Dereva anapaswa kuanza kwa kuwasiliana na kampuni yake; sisi tutasaidia kampuni kutekeleza ombi lake.
9. Mawasiliano
MOFULI Multibusiness & Services, Dar es Salaam · info@mofuli.co · 0610 154 907 · 0744 100 918.
10. Mabadiliko
Tukibadilisha sera hii, tutaweka toleo jipya hapa na kuwajulisha wamiliki wa kampuni kwa barua pepe au ndani ya app, kabla ya mabadiliko makubwa kuanza kutumika.